Gjykata Themelore në Mitrovicë ka caktuar masën e arrestit shtëpiak prej një muaji për mjekun A.V., i cili u arrestua më 28 tetor nën dyshimin për marrje ryshfeti.
Në njoftimin e Gjykatës thuhet se është refuzuar kërkesa e Prokurorisë për caktimin e masës së paraburgimit, ndërsa ndaj të pandehurit është vendosur masa më e butë – arrest shtëpiak.
“Gjykata Themelore në Mitrovicë – Departamenti për Krime të Rënda e ka refuzuar kërkesën e Prokurorisë Themelore në Mitrovicë – Departamenti për Krime të Rënda për caktimin e masës së paraburgimit ndaj të pandehurit A.V., dhe ndaj tij është caktuar masa e arrestit shtëpiak, në kohëzgjatje prej një (1) muaji,” thuhet në njoftimin e Gjykatës.
Sipas të njëjtit njoftim, kjo masë është caktuar për shkak të dyshimit të bazuar se i pandehuri ka kryer veprën penale “Marrje e ryshfetit”, në bazë të nenit 421 paragrafi 1 të Kodit Penal të Republikës së Kosovës (KPRK).
“Sipas Aktvendimit të Gjykatës Themelore në Mitrovicë – Departamenti për Krime të Rënda, ndaj të pandehurit A.V. kjo masë është caktuar për shkak të dyshimit të bazuar se ai ka kryer veprën penale ‘Marrje e ryshfetit’, nga neni 421 paragrafi 1 i KPRK-së,” shtohet në njoftim.
