Presidenti amerikan Donald Trump ka thënë se “i gjithë ferri” do të shpërthejë nëse Hamasi nuk liron pengjet e mbetura izraelite të mbajtur në Rripin e Gazës deri të shtunën.
Deklarata e tij erdhi pasi Hamasi pezulloi lirimin e radhës të robërve të mbajtur në Gaza për një kohë të pacaktuar, duke akuzuar Izraelin për shkeljen e kushteve të marrëveshjes së armëpushimit, duke përfshirë vazhdimin e vrasjes së palestinezëve dhe pengimin e shpërndarjes së ndihmës humanitare.
Por, Zëdhënësi i Hamasit Sami Abu Zuhri tha të martën se dhjetëra pengje do të kthehen vetëm nëse të gjitha palët mbeten të përkushtuara ndaj një marrëveshjeje armëpushimi të arritur muajin e kaluar.
“Trump duhet të kujtojë se ka një marrëveshje që duhet të respektohet nga të dyja palët,” tha ai, duke shtuar se gjuha kërcënuese vetëm i komplikon gjërat.
Ndërsa Trump tha se armëpushimi duhet të anulohet nëse Hamasi nuk i liron të gjithë pengjet e mbetura të shtunën, ai tha gjithashtu se një vendim i tillë do të varet nga Izraeli, raporton AP.
Gjatë fazës së parë të armëpushimit, Hamasi është zotuar të çlirojë gjithsej 33 pengje të kapur në sulmin e tij të 7 tetorit 2023, në këmbim të lirimit të rreth 2000 të burgosurve palestinezë nga Izraeli.
Palët kanë kryer pesë shkëmbime që nga 19 janari, duke liruar 21 pengje dhe mbi 730 të burgosur palestinezë deri më tani. Lufta mund të rifillojë në fillim të marsit nëse nuk arrihet marrëveshje për fazën e dytë më të komplikuar të armëpushimit, e cila kërkon kthimin e të gjithë pengjeve të mbetur dhe një zgjatje të pacaktuar të armëpushimit.
