Agjencia e Kosovës për Inteligjencë, në bashkëpunim me Prokurorinë Speciale dhe Inspektoratin Policor të Kosovës, ka realizuar një operacion të koordinuar kundër veprës penale “spiunazhi”, që ka rezultuar me arrestimin e një zyrtari të lartë policor.
Bojan Jevtiq, i cili ushtronte funksionin e zëvendëskomandantit dhe shefit të operativës në njërën nga strukturat policore në veri të Kosovës, dyshohet se ka transmetuar informacione të klasifikuara dhe plane operative te zyrtarë të BIA-s, Agjencisë Serbe për Inteligjencë.
Arrestimi i tij u krye në pikëkalimin kufitar “Dheu i Bardhë”, teksa tentonte të hynte në Kosovë nga Serbia.
Gjatë bastisjes në shtëpinë e tij janë sekuestruar dokumente konfidenciale të Policisë së Kosovës, disa telefona, pajisje USB, një armë e shkurtër, municion, si dhe shuma të mëdha parash në valuta të ndryshme, përfshirë 10 mijë euro, 2 milionë denarë serbë dhe 600 franga zvicerane.
Ndërsa nga KosovaPress kanë konfirmuar për se Jevtiq dyshohet se për vite me radhë ka transmetuar dokumente të klasifikuara policore dhe plane operative te zyrtarë të inteligjencës serbe
Prokuroria Speciale ka njoftuar se Jevtiq është ndaluar për 48 orë, ndërsa hetimet po vazhdojnë për të zbardhur tërësisht rrjetin dhe përmasat e dyshuara të spiunazhit.
