Kryetari i Komunës së Preshevës, Shqiprim Arifi, deklaroi se Lëvizja Vetëvendosje ka ndërhyrë vazhdimisht në procesin zgjedhor për Këshillit Kombëtar Shqiptar në Luginë.
Madje, Arifi thotë se Kosova ka ndarë nga 1 milionë euro për 4 partitë, vetëm me synimin për të arritur koalicion, shkruan teve1.info.
“Edhe pse i kemi fituar zgjedhjet, nuk ka qenë e mundshme të ndërtohet një koalicion. Për shkak të ndërhyrjes së Kosovës, në këtë kontekst të Lëvizjes Vetëvendosje, në këtë proces zgjedhor në mënyrë flagrante qysh nga fillimi. Pra, deri pardje ka pasur ndërhyrje flagrante nga Vetëvendosje në këtë proces zgjedhor. Ata përmes joshjes me para, i kanë futur në një pozitë partitë politike shqiptare që të bëjnë një marrëveshje, e cila tani për së dyti herë në Luginë të Preshevës që vendoset një rrotacion të kryetarit të këtij institucioni. Unë vetëm po e tregoj një fakt, nga pardje është mundësuar që të implimentohet një marrëveshje me para nga Kosova me vlerë prej 4 milionë euro, për 4 parti, për secilën parti nga 1 milionë euro”, deklaroi Arifi në emisionin “Ditari”.
I pyetur nga buxheti i kujt janë ndarë këto 4 milionë euro, Arifi tha se ato para janë ndarë nga kryeministria e udhëhequr nga Albin Kurti, në bashkëpunim me Ministrin e Mjedisit, Planifikimit Hapësinor dhe Infrastrukturës, Liburn Aliu.
“Prandaj, në këtë formë vetëm me joshjen e parave, kanë mundur të arrijnë në koalicion”, shtoi tutje Arifi në Tëvë1./teve1.info/.
