Kryetari i Luginës së Preshevës, Shqiprim Arifi i ka dërguar një letër kryeministrit të Kosovës, Albin Kurti, përmes së cilës ka kërkuar nga kreu i Qeverisë që mos ta ndërprejë dialogun me Serbinë.
Ai tha se nëse dialogu mes Kosovës dhe Serbisë ndërpritet atëherë shqiptarët e Luginës së Preshevës janë në shënjestër të një situate apo grupi terrorist.
“Lugina e Preshevës është Kosovë, çdo sulm ndaj shtetit të Kosovës në mënyrë të drejtpërdrejtë prek banorët e Preshevës. Në çdo betejë ne kemi qenë krah Kosovës, por sot kemi nevojë që Kosova të jetë me ne”.
“Në ditë si këto, bashkërendimi me miqtë tanë ndërkombëtarë SHBA dhe BE është e vetmja zgjidhje për Kosovën si dhe për Luginën e Preshevës”.
Arifi i ka kërkuar Kurtit që ta konsiderojë kërkesën e ndërkombëtarëve kur e ftojnë në dialog.
“Shqiptarët e Luginës kanë qenë të dënuar, të pambrojtur dhe të diskriminuar për 30 vjet dhe në 10 vitet e fundit edhe të pasivizuar nga adresat e tyre. Është jetike për ne të aktivizoni të gjitha kanalet e komunikimit diplomatik, për të garantuar siguri për shqiptarët në Luginë. Përndryshe, Lugina e Preshevës me veriun mund të bëhet “fuçi baruti””, thuhet ndër tjerash në letër.
