Argjentina ka triumfuar në edicionin e këtij viti të Kupës së Amerikës, pasi në finale ka mposhtur Kolumbinë me rezultatin minimal 1:0.
Finalja e luajtur të hënën në orët e para të mëngjesit nuk filloi me kohë, por filloi me vonesë prej më shumë se një ore për shkak se qindra tifozë pa bileta tentuan të futen në stadiumin “Hard Rock”.
Në fakt, Argjentinës iu deshën 120-të minuta lojë për ta mposhtur Kolumbinë pasi koha e rregullt e takimit përfundoi pa gola.
Sulmuesi i Interit, Lautaro Martinez ishte ai që ia siguroi Argjentinës fitoren në këtë finale. Martinez e zhbllokoi rezultatin me golin e shënuar në minutën e 112-të, i cili doli të jetë edhe goli i fitores.
Argjentina finalen ndaj Kolumbisë, e përfundoi pa kapitenin Lionel Messi, i cili u detyrua të largohet nga loja në minutën e 66-të për shkak të lëndimit. Ndërkohë, Angel Di Maria pas këtij suksesi është tërhequr nga Kombëtarja e Argjentinës, e cila e fitoi edhe Kupën e Botës “Katari 2022”.
Me këtë triumf, Argjentina është bërë kombëtarja me e suksesshme në Kupën e Amerikës, turne ky që e ka fituar plotë 16-të herë duke e lënë pas vetes Uruguain me 15-të tituj.
Në të vërtetë, ky është titulli i dytë rresht për Argjentinën në këtë garë pasi Kupën e Amerikës e fitoi edhe në vitin 2021.
