I transferuar vetëm verën e kaluar, nga Luzerni në Club Brugge, Ardon Jashari ka zgjuar interesimin e skuadrës së madhe franceze Paris St. Germain dhe kjo po duket se nuk është më një spekulim.
Jashari kaloi nga Zvicra në Belgjikë për gjashtë milionë euro, por paraqitjet e mira të mesfushorit me skuadrën nga Brugge, sipas mediave në Zvicër, po i përcjell tash e sa kohë skuadra parisiene.
22-vjeçari është aktualisht në garë për titullin kampion me Club Bruggen. Katër xhiro para fundit, ekipi është në vendin e dytë në garën për titull kampioni, vetëm një pikë pas Union Saint-Gilloise.
Ardon Jashari është një nga lojtarët më të rëndësishëm te Brugge, duke luajtur në 47 ndeshje këtë sezon, dhe duke shkëlqyer në Ligën e Kampionëve.
Sipas footenfrance.fr, një nga ekipet më të mëdha, Paris Saint-Germain, është i interesuar për mesfushorin mbrojtës. Burimet e përmendura thonë se drejtori sportiv i PSG, Luis Campos, ka dy lojtarë nga Club Brugge në listën e tij. Përveç Ardon Jasharit, ka edhe thashetheme për një mundësi të blerjes së Maxim De Cuyper. Jashari ka kontratë me klubin belg deri në verën e vitit 2029.
Vlera e tij e tregut aktualisht është 25 milionë euro. Po ashtu, edhe transfermarkt.ch ka raportuar për një kalim të mundshëm të Jasharit në Francë.
