Arabia Saudite lëshoi alarme emergjence të martën duke paralajmëruar për një “rrezik potencial” në Xheda, Mekë dhe Taif në perëndim të vendit, duke u bërë thirrje banorëve të kërkojnë strehim dhe të ndjekin udhëzimet zyrtare të sigurisë.
Alarmet u lëshuan përmes Platformës Kombëtare të Paralajmërimit të Hershëm për Emergjencat, sipas Mbrojtjes Civile Saudite.
Autoritetet nuk specifikuan natyrën e rrezikut të mundshëm, shkruan Anadolu.
Banorëve iu bë thirrje të ruanin qetësinë dhe të zhvendoseshin menjëherë në vendin më të afërt të sigurt, mundësisht brenda një ndërtese ose një dhome të brendshme larg dritareve, dhe të qëndronin atje derisa të kalojë rreziku.
Mbrojtja Civile gjithashtu këshilloi njerëzit të qëndronin larg zonave të hapura, dritareve, ballkoneve dhe çative, ndërsa atyre që ndodheshin jashtë iu tha të hynin në ndërtesën më të afërt ose të strehoheshin pas një barriere të fortë.
Shoferët që merrnin një alarm u udhëzuan të ndalonin larg urave dhe ndërtesave të larta, ndërsa publikut iu bë thirrje të shmangte grumbullimet dhe zonat e rrezikshme dhe të ndiqte udhëzimet përmes kanaleve zyrtare.
Alarmet vijnë në mes të përshkallëzimit të përleshjeve midis Arabisë Saudite dhe grupit Huthi të Jemenit, i cili ka kryer një seri sulmesh me raketa dhe dronë në qytetet dhe infrastrukturën saudite ditët e fundit.
Forcat saudite janë përgjigjur me sulme ndaj pozicioneve të Huthëve në Jemen.
