Kompania Apple ka hequr nga dyqani i saj App Store aplikacionin e njohur dhe të kontestuar për takime, Tea. Aplikacioni Tea u hoq së bashku me aplikacionin e lidhur TeaOnHer, pas dyshimeve serioze lidhur me mbrojtjen e privatësisë së përdoruesve dhe moderimin e përmbajtjes.
Sipas portalit Neowin dhe TechCrunch, Apple konfirmoi se zhvilluesit e aplikacioneve kishin shkelur disa udhëzime, përfshirë ato që lidhen me sigurinë e përdoruesve, ndarjen e të dhënave personale dhe përmbajtjen e papërshtatshme.
Kompania theksoi se zhvilluesve u ishin dërguar paralajmërime disa herë, por problemet nuk u zgjidhën, prandaj u vendos heqja e plotë e aplikacioneve nga platforma.
Aplikacioni Tea u bë viral pasi lejonte përdoruese të vlerësonin anonimisht meshkujt bazuar në përvojat e tyre të mëparshme në takime, duke përdorur etiketa si “green flag” ose “red flag”.
Megjithatë, koncepti shkaktoi reagime të forta për shkak të mundësisë së shkeljes së privatësisë dhe keqpërdorimit të informacioneve. Situatën e përkeqësoi një incident i rrjedhjes së të dhënave, ku sipas raportimeve u komprometuan më shumë se 72 mijë fotografi të përdoruesve, përfshirë selfie dhe fotografi të dokumenteve personale.
Apple njoftoi se heqja e aplikacioneve u krye më 21 tetor 2025, në nivel global. Megjithatë, përdoruesit që i kishin shkarkuar më parë mund të vazhdojnë t’i përdorin, ndërsa aplikacionet ende gjenden në dyqanin Google Play.
