Oborret e konvikteve së shpejti pritet të mbushen përsëri me studentë.
Kjo pasi nga kjo e hënë është hapur konkursi për pranimin e studentëve të rinj në Qendrën e Studentëve në Prishtinë.
E që në ditën e parë, interesimi për një vend qe i lartë.
Sipas drejtorit të Qendrës së Studentëve, Ekrem Rudari, deri tani kanë aplikuar mbi dy mijë studentë.
“Është një numër mjaft i madh dhe presim që këtë vit të ketë numër më të madh se vitin e kaluar. Edhe vitin e kalum ka qenë mbi gjashtë mijë, po ashtu edhe në këtë vit pritet, në bazë të aplikimeve, është një numër mjaft i madh”, ka thënë drejtori i Qendrës së Studentëve, Ekrem Rudari.
Gjatë aplikimit këtë vit, është larguar mundësia për të zgjedhur menzën.
E kjo, sipas Rudarit, është bërë për një arsye.
“Gjatë aplikimit vitin e kaluar dhe viteve të tjera gjithmonë ka qenë mbi 300 numri i studentëve që kanë apliku për menzë dhe sidomos viti i parë ata kanë gabu, e kemi hek komplet menzën që të mos të gabojnë dhe aplikon vetëm për konvikt. Pastaj për menzë, ata studentë të cilët nuk kanë mundësi me u pranu, e kanë mundësinë me ardh në menzë pa problem me u ushqyer”, u shpreh tutje Rudari.
Rudari u shpreh se ndryshimet në menu bëhen vazhdimisht.
“Në menu na vazhdimisht bëjmë ndryshime, shohim cilat ushqime janë shku ma shumë, cilat nuk janë shku, i hekim, i shtojmë. Menyja është shumë e pasur, diku 20 lloje të ushqimit kemi brenda drekës ose brenda darkës”, deklaroj Rudari.
Gjithashtu, këtë vit do të fitojnë pikë shtesë edhe një kategori e studentëve, pikë këto që hyjnë ndër kriteret për pranimin në Qendrën e Studentëve.
“Kemi pas edhe për disa pikë, për shembull e kemi shtu një student i cili nuk i ka dy prind, tash kjo është më e reja që i fiton pesë pikë plus”, ka theksuar Rudari.
Aplikimet mbeten të hapura deri më 18 shtator.
Ndërsa, nga 1 tetori, të gjithë studentët e pranuar mund të vendosen në konvikte.
