Gjykata e Apelit ka konfirmuar vendimin e shkallës së parë për dënim me burgim të përjetshëm ndaj Jeton Vllasaliu dhe Nexhat Vllasaliu, të shpallur fajtorë për vrasjen e biznesmenit Bedri Rexhepi.
Sipas vendimit të publikuar të premten, Apeli i ka hedhur poshtë si të pabazuara ankesat e të dënuarve, të cilët kishin kërkuar ulje të dënimit.
Në aktakuzë thuhet se gjatë periudhës nga 9 janari deri më 8 prill 2021, dy vëllezërit kishin planifikuar vrasjen e Rexhepit me qëllim përfitimi material. Ata dyshohet se e kishin mashtruar viktimën duke i ofruar për shitje dy automjete në vlerë prej 30 mijë eurosh.
Më 8 prill 2021, Rexhepi kishte shkuar në shtëpinë e njërit prej të pandehurve, ku sipas aktakuzës, Jeton Vllasaliu e kishte mbytur duke e ngufatur, me bindjen se viktima kishte me vete shumën e plotë të parave. Megjithatë, tek ai ishin gjetur vetëm 8 mijë euro, të cilat më pas i kishin ndarë mes vete.
Pas krimit, trupin e pajetë e kishin fshehur në katin e tretë të shtëpisë dhe më pas kishin tentuar të zhdukin gjurmët duke e varrosur. Ndërkohë, Nexhat Vllasaliu kishte dërguar veturën e viktimës në arat e fshatit Shushicë në Graçanicë, duke qenë në komunikim të vazhdueshëm me të vëllain.
Mbetjet mortore të Bedri Rexhepi u zbuluan më 30 shtator 2022, më shumë se një vit pas vrasjes, në zonën e njohur si Mali i Madh në Vllasali të Novobërdës.
“Duke i vlerësuar të gjitha rrethanat e përshkruara si në këtë aktgjykim, kolegji gjykues është i bindur se me dënimin e shqiptuar me burgim të përjetshëm sikurse në dispozitiv të aktgjykimit, do të arrihet efekti dhe qëllimi i tij, që të parandalojë kryerësit nga kryerja e veprave penale në të ardhmen dhe të bëjë rehabilitimin e tij, të parandalojë personat e tjerë nga kryerja e veprave penale, të bëjë kompensimin e viktimave ose të komunitetit për humbjet ose dëmet e shkaktuara nga veprat penale dhe të shprehë gjykimin shoqëror për veprën penale, ngritjen e moralit dhe forcimin e detyrimit për respektimin e ligjit, të paraparë në nenin 38 të KPK”, thuhet në njoftim. /teve1.info/
