“Gjykata Themelore në Prishtinë – Departamenti Special, sipas aktgjykimit PS.nr.47/2023, të datës 19.07.2024, të akuzuarin E.B., e ka shpallur fajtor për shkak të veprës penale krime lufte kundër popullatës civile, nga neni 142 lidhur me nenin 22 të LP të RSFJ, duke i shqiptuar dënim me burgim në kohëzgjatje prej 12 (dymbëdhjetë) vite, në të cilin dënim do t`i llogaritet koha e qëndrimit në paraburgim nga data 19.10.2022 e tutje, por jo më shumë se dënimi i shqiptuar me burgim, ndërsa të dëmtuarit në këtë çështje penale janë udhëzuar për realizimin e kërkesës pasurore-juridike në kontest juridiko-civil”, thuhet në njoftimin e Apelit.
Më tej thuhet se, Gjykata e Apelit, pas analizimit të aktgjykimit të ankimuar, së bashku me shkresat e lëndës, ka vlerësuar pretendimet ankimore dhe ka ardhur në përfundim se aktgjykimi i ankimuar nuk është i përfshirë në shkelje esenciale të dispozitave të procedurës penale nga neni 384 të KPPRK, për të cilat shkelje përkujdeset edhe sipas detyrës zyrtare, për faktin se dispozitivi është i qartë dhe i kuptueshëm ndërsa në arsyetim janë dhënë arsyet e plota dhe të qarta për faktet vendimtare, andaj aktgjykimi i ankimuar nuk përmban asnjë shkelje tjetër të cilat do ta kushtëzonin anulimin e detyrueshëm të tij e as që është shkelur ligji penal në dëm të akuzuarit siç pretendon mbrojtja në ankesë.
