Gjykata e Apelit ka anuluar aktgjykimin e Gjykatës Themelore në Prishtinë ndaj Çedomir Aksiç, pas ankesës së mbrojtjes.
Apeli ka kthyer në rigjykim dhe vendosje.
Gjykata Themelore në Prishtinë më 26.12.2024, në mungesë të akuzuarin Çedomir Aksiç, e ka shpallur fajtor për veprën penale në bashkëkryerje krimet e luftës kundër popullsisë civile nga neni 142 lidhur me nenin 22 të Ligjit Penal të Republikës Socialiste Federative të Jugosllavisë, dhe i ka shqiptuar dënim me burgim prej 15 vjet.
Apeli ka konstatuar se ka pasur shkelje esenciale të dispozitave të procedurës penale dhe thuhet se procesi gjyqësor është zhvilluar pa u ndërmarrë përpjekje të arsyeshme për njoftimin e të akuzuarit për shqyrtimin gjyqësor dhe për sigurimin e pranisë së tij.
“Kolegji i kësaj gjykate ka gjetur se aktgjykimi i gjykatës së shkallës së parë është i përfshirë me shkelje esenciale të dispozitave të procedurës penale nga neni 384 paragrafi 1 nënparagrafi 1.3 të KPP-së, pasi që gjykimi është mbajtur në mungesë të të akuzuarit pa u përmbushur kushtet ligjore të përcaktuara në nenin 303 paragrafët 7 dhe 8 të KPP-së, ngase, sipas vlerësimit të kolegjit, gjykimi në mungesë-shqyrtimi gjyqësor është zhvilluar pa u përmbushur kushtet ligjore, përkatësisht pa u ndërmarrë përpjekje të arsyeshme për njoftimin e të akuzuarit për shqyrtimin gjyqësor dhe për sigurimin e pranisë së tij”, thuhet ne njoftim.
Aksiq në dhjetori të vitit 2024 u dënua me 15 vjet burgim për krime lufte, për pjesëmarrje në masakrën e Reçakut.
