Gjykata e Apelit ua ka caktuar masën e paraburgimit tre të dyshuarve të cilët u kapën duke transportuar rreth 1 milion euro në pikëkalimin kufitar në Merdar në shkurt.
Gjykata ka vlerësuar se atyre duhet t’u caktohet masa e paraburgimit “ngase me lënien në liri, apo caktimin e ndonjë mase tjetër nuk do të mund të arrihej prezenca e tyre në procedurë penale, andaj e aprovoi ankesën e Prokurorisë Speciale të Republikës së Kosovës si të bazuar”.
Në vendimin e Apelit thuhet se ka bazë ligjore për caktimin e paraburgimit pasi ekziston rreziku i arratisjes meqë të dyshuarit janë shtetas të Shqipërisë.
Prokuroria Speciale pati kërkuar masën e paraburgimit për tre të arrestuarit nën dyshimet për veprën penale “shpëlarja e parave”. Por Gjykata e pati hedhur poshtë duke thënë se nuk është përmendur asnjë provë sado sipërfaqësore në të cilën Prokuroria e mbështet pretendimin lidhur me dyshimin e bazuar.
Të dyshuarit u kapën duke transportuar 1 milion eurot e padeklaruara të fshehura në një hapësirë të modifikuar në dyshemenë e një minibusi. E.A. po drejtonte mjetin. Njëri prej të dyshuarve, A.K., ishte polic në Tiranë që u suspendua pas arrestimit.
Në brendi të minibusit janë gjetur 18 pako me para, të përbëra nga bankënota të ndryshme prej 10, 20, 50, 100 deri në 200 euro, secila me nga një numër të shënuar në qesen me të cilën janë mbështjellë.
Minibusi, i cili po qarkullonte nga Serbia në drejtim të Kosovës, ka qenë pa udhëtarë, gjë kjo që për zyrtarë të Doganës ka përbërë indikacion për kontroll të detajuar.
