Ceremonia e 97-të e ‘Oscars’, e mbajtur mbrëmë në Los Angeles, kurorëzoi “Anora” si fituesin absolut të mbrëmjes.
Filmi i regjisorit Sean Baker fitoi pesë çmime prestigjioze, duke përfshirë atë për Filmin më të Mirë, Regjinë më të Mirë, Skenarin më të Mirë Origjinal dhe Arritjen në Montazh.
Një nga surprizat e mëdha të natës ishte fitorja e Mikey Madison, e cila, në moshën 25-vjeçare, u shpall Aktorja më e Mirë për rolin e saj në këtë film.
Ajo triumfoi përballë konkurrenteve të forta si Cynthia Erivo “Wicked”, Demi Moore “The Substance”, Karla Sofía Gascon “Emilia Pérez” dhe Fernanda Torres “I’m Still Here”.
Për çfarë flet “Anora”?
Filmi ndjek historinë e Anna-s (Mikey Madison), një striptiste e re nga New York-u, e cila bie në dashuri me Vanya-n (Mark Eydelshteyn), djalin e një miliarderi rus.
Ata vendosin të martohen menjëherë, por kur familja e tij mëson për këtë, dërgon njerëz për të ndaluar martesën, duke shkaktuar një ndjekje dramatike nëpër rrugët e qytetit.
I përshkruar si një përzierje emocionuese dhe komike e një historie moderne të “Hirushes”, filmi është vlerësuar lart nga kritikët.
Në Rotten Tomatoes, ka marrë 93% vlerësim nga kritikët dhe 89% nga audienca, ndërsa në IMDb ka një vlerësim prej 7.7/10.
Me suksesin e jashtëzakonshëm të “Anora”, Sean Baker konfirmon talentin e tij si një nga regjisorët më të rëndësishëm të kohës sonë, ndërsa Mikey Madison hyn në historinë e Oscars me një performancë të paharrueshme. /Telegrafi/
