Teksa i afrohet Rripit të Gazës, anija humanitare “Madleen” është përballur me ndërprerjen e aksesit në internet të kërkuar nga autoritetet izraelite.
Yasemin Acar, aktiviste për të drejtat e njeriut dhe zëdhënëse e Koalicionit të Flotiljes së Lirisë (FFC), njoftoi për një lidhje të dobësuar pasi Izraeli kishte filluar zyrtarisht bllokimin e komunikimit, vetëm pak orë para arritjes së mundshme në Gaza.
“Lidhja jonë është vështirësuar në mënyrë dramatike. Presim komunikimi të ndërpritet në çdo moment,” tha Acar për agjencinë Anadoly.
Anija “Madleen”, e cila u nis nga porti italian i Catani më 1 qershor, ndodhet rreth 116 milje larg Gazës, ende në ujëra ndërkombëtare. Ajo transporton ndihma për popullsinë palestineze, përfshirë formula për foshnja, miell, oriz, produkte sanitare dhe pajisje mjekësore.
Sipas Acar, çdo sulm ushtarak kundër anijeve do të jetë një krim lufte, duke qenë se anija ndodhet jashtë zonës territoriale të Izraelit dhe është pjesë e një misioni humanitar paqësor.
Ajo përmendi gjithashtu precedentët e rrezikshëm si bastisja e anijes “Mavi Marmara” në vitin 2010, ku u vranë 10 aktivistë, dhe një sulm me dron ndaj anijes “Ndërgjegjja” pranë Maltës, më 2 maj.
Ndërkohë, Ministri Izraelit i Mbrojtjes, Israel Katz, urdhëroi të dielën ushtrinë që të parandalonte anijen të arrinte në Gaza.
Duke ndarë një foto të takimit të tij me Shefin e Shtabit Eyal Zamir dhe komandantët detarë, Katz tha: “I kam udhëzuar ushtrinë izraelite të bëjë gjithçka që është e nevojshme për të parandaluar që flotilja e urrejtjes Madleen të arrijë në Gaza.
Ai njoftoi planet për ridrejtimin e saj me forcë drejt portit izraelit të Ashdodit dhe sulmoi aktivistët publikë në bord – përfshirë Greta Thunberg dhe aktorin, Liam Cunningham – duke i quajtur “zëdhënës të propagandës antisemite”.
Acar kritikoi heshtjen e bashkësisë ndërkombëtare ndaj bllokadës së Gazës dhe e përshkroi misionin si një akt urgjent humanitar. “Ne nuk mbajmë armë. Nuk jemi këtu për të luftuar.”
Ekuipazhi prej 12 personash i “Madleen” mbetet në gjendje të mirë morale, ndërsa shpresojnë të arrijnë në Gaza të hënën në mëngjes – për sa kohë nuk ndërhyhet me forcën.
