Banorët u tronditën nga ajo që u duk si një “shpërthim nëntokësor” pasi tërmeti më i madh i Anglisë në dy vjet preku qytete dhe fshatra në të gjithë Lancashire dhe Cumbria.
Një tërmet me magnitudë 3.3 ballë u ndje deri në 19 kilometra nga epiqendra pranë fshatit bregdetar Silverdale në Lancashire pak pas orës 23:23 të mërkurën, raporton Guardian.
Njerëz në të gjithë rajonin thanë se shtëpitë e tyre ishin tronditur, me njërin që tha se ndjente që zona “ishte bombarduar”.
Shërbimi Gjeografik Britanik (BGS) konfirmoi se ky ishte tërmeti më i fortë në Angli që nga një tjetër tërmet me magnitudë 3.3 ballë në Staffordshire në vitin 2023.
Tërmetet me një magnitudë të tillë janë relativisht të rralla në Mbretërinë e Bashkuar. Vetëm një e dhjeta e 200 deri në 300 incidenteve sizmike të raportuara çdo vit janë mjaftueshëm të forta që njerëzit t’i ndiejnë ato, tha BGS.
Një zëdhënës tha se çdo vit në Mbretërinë e Bashkuar ndodhin dy ose tre tërmete me magnitudë të ngjashme, por ngjarja e së mërkurës duket të jetë më e forta në Anglinë veriperëndimore që nga një dridhje me magnitudë 3.7 ballë e shkundi Gjirin e Morecambe në vitin 2009.
