Aktivisti i Partisë Social Demokrate, Lisjan Perolli, thotë se presidentja e vendit, Vjosa Osmani, takimet e e sotme në Moldavi i ka bërë më shumë si notere e kryeministrit, Albin Kurti.
Derisa ka përmendur edhe deklaratën e ambasadorit të ShBA-së në Kosovë, Jeffrey Hovenier, pas takimit me Kurtin, Perolli vlerësoi se deri më tani Kosova nuk ka përfituar asgjë nga tensionimet në veri.
“Siç e pamë nga deklaratat e sotme të Hovenier, po shihet qartazi që Qeveria dhe Presidenca janë në një vijë. Presidentja Osmani në Moladavi është pak a shumë si notere e Kurtit në Kosovë, sepse të njëjtat fjalë pa ndonjë ndryshim të madh, i tha edhe Kurti pasi përfundoi takimin me Hovenier. Në fund të ditës, po shohim që Kosova nuk ka përfituar asgjë nga tensionimi i situatës në veri që e ka shkaktuar Kurti dhe e cila po mbështetet nga presidentja Osmani. Ajo çka ka ndodhur në veri, është një skenar më të cilin e kemi përjetuar edhe më herët në Kosovë”, deklaroi Perolli në emisionin “Ditari”.
Madje sipas tij, zhvillimet aktuale në veri, janë një metodë me të cilën Kurti po funksionon, shkruan teve1.info.
“Në momentin që veriun e trajtojnë si çështje sigurie dhe jo si problem politik, atëherë përgjigja për të do të jetë gjithmonë policia. Kjo është metodë me të cilën Kurti po funksionin, ky është problem më i madh. E kemi një qeveri, e cila për dallim të të gjitha qeverive më herët, e ka shkelur kushtetutën tre herë”, shtoi tutje ai në Tëvë1.
Më tej, ky i fundit propozoi edhe disa mënyra për shtensionimin e situatës në komunat veriore.
“Zgjedhjet duhet të shihen në kontekstin e dialogut me Serbinë. Përbrenda kornizës së dialogut në të cilën gjendemi, rezultati përfundimtar i tij po del të jetë Asociacioni, në çdo variant. Kosovës urgjentisht i nevojitet të ndryshojë kornizën e dialogut”, theksoi ai.
Presidentja e Kosovës, Vjosa Osmani, tashmë ka përfunduar takimin me presidentin e Francës, Emmanuel Macron, kancelarin e Gjermanisë, Olaf Sholz dhe përfaqësuesin e Lartë të BE-së, Josep Borrell.
Siç ka njoftuar Osmani, në këtë takim është diskutuar për zhvillimet e fundit në veri.
Ndërsa, ambasadori i ShBA-së në Kosovë, Jeffrey Hovenier, pas takimit me kryeministrin Albin Kurti, tha se patën një diskutim të mirë rreth situatës në veri të vendit./teve1.info/.
