Megjithatë, për punimet këtij forumi, Kuvendi nuk caktoi për të marrë pjesë asnjë anëtar të Komisionit për Mbikëqyrjen e Agjencisë Kosovare për Inteligjencë.
Atje nuk ka marrë pjesë as kryesuesja e Komisionit, Ganimete Musliu. Ajo thotë se në takimet e forumit u angazhuan dy deputetë të Vetëvendosjes, Mefail Bajqinovci e Shqipe Mehmeti-Selimi.
Sipas saj, fakti që nuk u caktuan deputetë të opozitës për këto udhëtime, mund të jetë indikatorë se ata janë të padëshirueshëm për pushtetin.
“Ne mund të jemi të padëshirueshëm ndoshta për kryetarin e Kuvendit ose për këdo tjetër nga Qeveria, por i kemi detyrat ligjore që na i përcakton rregullorja e Kuvendit dhe ligjet në fuqi. Unë mendoj që e ka ba një gabim të madh kryetari i Kuvendit në momentin që nuk e ka njoftu Komisionin për AKI-në dhe në momentin që e ka anashkalu nga pjesëmarrja në këtë forum”
Sqarim për këtë situatë Musliu ka kërkuar qysh nga 28 shkurti. Nëse nuk merr përgjigje nga kryetari i Kuvendit, Glauk Konjufca në ditët e ardhshme, Musliu ka bërë një paralajmërim.
Unë po pres edhe disa ditë që të ma kthej një përgjigje kryetari me shkrim që ta di dhe ta informoj komisionin parlamentar dhe nëse unë nuk marr një përgjigje nga kryetari Konjufca se pse është anashkalu komisioni parlamentar jo Ganimete Musliu, jo kryetarja e komisionit sepse ne në komision kemi edhe anëtarë nga VV-ja, unë do t’i shkruaj letër direkt forumit për të cilat bëhet fjalë.
Nga kabineti i kryeparlamentarit Glauk Konjufca i kanë thënë televizionit se në këto takime ishte përcaktuar të shkonte vet kryetari Konjufca. Megjithatë ai ia kishte deleguar pjesëmarrjen deputetëve Selimi e Bajqinovci. Shefi i kabinetit të tij, Ilir Kërqeli i ka thënë televizionit se në takimin që do të mbahet në Guatemalë në kuadër të këtij forumi, do të caktohen përfaqësues nga secila parti.
Tëvë 1 ka siguruar kërkesën për sqarim parashtruar nga deputetja Musliu, për mospërfshirjen në forum të anëtarëve të komisionit për AKI-në. Aty shkruhet se ndarja e deputetëve në komisione parlamentare nënkupton edhe ndarjen e përgjegjësive përfshirë edhe pjesëmarrjen në ngjarjet e tilla.
Kronika e realizuar nga Gojart Jashari
