Që nga vrasja e rreshterit Afrim Bunjaku në Banjskë të Zveçanit në shtator të vitit të kaluar, situata në pjesën veriore ka ndryshuar krejtësisht.
Policia e Kosovës ka shtuar numrin e zyrtarëve policorë atje ku në çdo pjesë në katër komuna, ka prezencë të shtuar.
Gjatë kësaj periudhe, ka pasur aksione të ndryshme të Policisë për të shtrirë sovranitetin dhe sundimin e ligjit në atë pjesë.
Një i tillë ka qenë edhe gjatë të hënës, ku është mbyllur një nga filialet e Bankës së Serbisë që operonte ilegalisht në Mitrovicë të Veriut.
Në aspektin e legjitimitetit, këtë aksion e ka përshëndetur një nga ish-drejtorët e Policisë së Kosovës.
Mirëpo, deputeti opozitar vlerëson se aksione të tilla kur kanë të bëjnë me pjesën veriore, duhet koordinuar edhe me bashkësinë ndërkombëtare.
“Nëse flasim për vërejtjet që jemi duke i marrë nga partnerët tanë strategjikë, nga Departamenti Amerikan i Shtetit atëherë duhet të jemi të shqetësuar. Mendoj që ne duhet të koordinojmë veprimet me partnerët tanë dhe po ashtu kemi një proces të dialogut në Bruksel çështjen për dinarin, mendoj që Qeveria e vendit dhe institucionet e zbatimit të ligjit në këtë rast Qeveria duhet të jetë e kujdesshme që të koordinohet dhe të kryejë hapat e duhur me partnerët tanë”, ka deklaruar deputeti i PDK-së, Rashit Qalaj.
Kurse, anëtari i Komisionit Parlamentar për Siguri, Anton Quni thotë se varet nga Beogradi se a do të ketë tensione në atë pjesë apo jo.
Derisa shton se Policia e Kosovës është e gatshme përballë çdo tensioni të mundshëm.
“Policia e Kosovës ka kapacitete të mjaftueshme deri në disa limite por nëse ato tejkalohen atëherë doemos përfshihen edhe forcat e KFOR-it. Prandaj edhe bëhet vërejtjet nga partnerët tanë që për veprime të tilla, për procese të tilla do duhej një bashkëkoordinim i mirë sepse janë të kyçur shumë faktorë dhe situata është shumë më komplekse.”
Gjatë javës së kaluar, institucionet e sigurisë së Kosovës kanë pasur një aksion të suksesshëm ku është gjetur sasi e madhe e armatimit në veriun e Kosovës.