Trajneri Carlo Ancelotti edhe zyrtarisht ka rinovuar kontratën me skuadrën e Real Madridit. Me rinovimin e kontratës që i skadonte në fund të këtij edicioni, Ancelotti do të jetë në krye të Real Madridit deri në vitin 2026, ka njoftuar klubi madrilen të premten.
Në njoftimin e klubit thuhet se Ancelotti do ta vazhdojë punën e tij edhe për dy edicionet e ardhshme dhe shpresojnë se gjatë kësaj periudhe sukseset nuk do të mungojnë.
Me rinovimin e kontratës, Ancelotti u ka dhënë fund spekulimeve se në fund të këtij edicioni do të emërohet selektor i Përfaqësueses së Brazilit. Në fakt, Ancelotti kishte ofertë nga federata braziliane, por në fund zgjodhi të qëndrojë në krye të skuadrës spanjolle.
Kjo është aventura e dytë e Ancelottit te Real Madridi pasi u rikthye në verën e vitit 2021. Ai më herët ka qenë trajner i klubit spanjoll prej vitit 2013 deri në vitin 2015. Aktualisht, Reali është lider në La Liga.
