Zgjedhjet e 3 Prillit që do të mbahen në Serbi, kanë ngjallur reagime të shumta në rajon. Rezultati i këtyre zgjedhjeve, pritjeve në Prishtinë thuajse është i ditur, Vuçiq do të fitoj edhe një mandat.
Analisti politik Imer Mushkolaj, thotë se presidenti aktual në Serbi, do të marr edhe një mandat tjetër me bekimin e Bashkimit Evropian.
“Fitorja edhe një herë e Aleksandër Vuciqit në Serbi nuk garanton se qasja karshi dialogut do të jetë tjetër, do të vazhdojë e njëjta qasje edhe kjo edhe me bekimin e Bashkimit Evropian. Mos të harrojmë që Bashkimi Evropian është duke e përkrahur Vuciqin që të jetë edhe për një mandat në pushtet me idenë që ai është personi i duhur që mund ta zgjidh këtë çështje, pra që mund ta zgjidh problemin që e ka me Kosovën, duke pasur parasysh edhe fuqinë politike që ai e ka atje”, tha Mushkolaj.
Ndërsa profesori universitar Arben Fetoshi, thotë se ndonëse dialogu varet nga ecuria e situatës në Ukrainë, pas zgjedhjeve serbe mund të pritet një intensifikim i dialogut Kosovë – Serbi.
“Unë besoj që pas zgjedhjeve të 3 Prillit, duke ju referu edhe një angazhimi të sforcuar të faktorëve ndërkombëtar do të kemi përpjekje më serioze për ta përmbyllur dialogun tash më më shumë se një dekadë dhe pavarësisht rezultatit të zgjedhjeve atje, unë besoj që bashkësia ndërkombëtare ka vendos një proces të koordinuar deri më tani me zotërinë Vuciq dhe shpresoj që mas zgjedhjeve ky proces do të konsitojë në përpjekjet për gjetjen e zgjidhjes finale” tha Fetoshi.
Refuzimi i Serbisë, për të mbajtur zgjedhjet e 3 Prillit në Kosovë, ka nxitur reagimet e Bashkimit Evropian, të cilët e kanë kritikuar Kosovën për minimin e rrugës evropiane.
Raporti i gazetarit Valmir Gallopeni.
