Angazhimi i serbëve në Policinë e Kosovës, po përcillet me kërcënime, ndërsa analistët vlerësojnë së kërcënimet vijnë nga Serbia dhe grupet e saj kriminale. Sipas tyre, institucionet e Kosovës duhet të dëshmojnë partneritet me bashkësinë ndërkombëtare që do të mundësojë edhe krijimin e një stabiliteti në veri të vendit.
Analistët vlerësojnë se Serbia po përpiqet që me çdo kusht dhe mënyrë të pengojë avancimin e mëtutjeshëm të garantimit të sigurisë për komunitetin serb.
Analisti, Drizan Shala për RTK thotë se institucionet e Kosovës duhet që të informojnë dhe kërkojnë nga faktori ndërkombëtar që Serbia të heq dorë nga kërcënimet dhe shantazhet.
“Unë mendoj se faktori ndërkombëtar ka informacion. Presioni nuk duhet të bëhet vetëm në aspekt deklarativ por efektiv. Nuk duhet të lejojmë që të ketë presion sikurse ka ndodhur edhe kundrejt efektivëve ushtarakë”, ka thënë Shala.
Analisti tjetër i sigurisë, Fadil Kajtazi, thotë se puna e këtyre policëve në veri nën një presion psikologjik dhe kërcënimi nga një shtet nuk është çështje e lehtë.
“Ajo që është dëshpëruese është se si iu kemi qasur këtij problemi duke i vënë në peshore kapacitetet tona në raport me Serbinë. Kështu që kemi eliminuar një faktor që ka qenë dominues në ruajtjen e stabilitetit, me të cilin Qeveria është në konflikt, pasi që është nën sanksione të bashkësisë ndërkombëtare”, ka thënë Kajtazi.
Sipas analistit të sigurisë, Nuredin Ibishi, detyrë e institucioneve është që zyrtarët e rinj t’i sigurojë gjatë kryerjes së detyrës në veri të vendit por edhe nëpër shtëpitë e tyre, që të mos ndodh e njëjta gjë siç ka ndodhur me pjesëtarët serbë të FSK-së.
“Zyrtarët serbë të Policisë së Kosovës duhet të kthehen të punojnë dhe t’i shërbejnë komunitetit të vet, normal në kuadër të detyrave ligjore, sipas Ligjit të Policisë së Kosovës, por edhe Kushtetutës së dhe ligjeve tjera të Kosovës”, ka thënë Ibishi.
Ndryshe 72 policë të rinj nga komunitetet joshumicë nisën punën në fillim të kësaj jave. Policia bëri të ditur se 45 prej tyre janë serbë, 16 boshnjakë, 8 nga komunitetet rom, ashkali dhe egjiptian dhe 3 turq.