Xhiro e 17-të në Superligën e Kosovës në basketboll është dominuar totalisht nga amerikanët, të cilët edhe përbëjnë pesëshen më të mirë të javës.
Të hënën, Federata e Basketbollit të Kosovës (FBK), ka publikuar lojtarin më të mirë të xhiros por edhe Top-5, siç bën zakonisht pas përfundimit të secilës javë në Superligë.
“MVP i Javës” është shpallur basketbollisti i Trepçës, amerikani Akili Vining që shkëlqeu në fitoren ndaj Bashkimit, duke e mbyllur ndeshjen me 23 pikë të shënuara, 4 kërcime dhe 9 asistime.
Gjithashtu, Vining është përfshirë edhe në pesëshen më të mirë të xhiros, që përbëhet nga dyshja e Yllit, Scott Bamforth e Brandon Huffman, pastaj Shaquan Jules i Borës dhe Khalil Dukes i Sigal Prishtinës.
Bamforth dhe Huffman, udhëhoqën Yllin drejt fitores së radhës në kampionat ndaj Vëllaznimit, ku realizuan 25 pikë, 3 kërcime e 4 asistime përkatësisht 17 pikë e 10 kërcime.
Jules udhëhoqi Borën drejt triumfit ndaj Pejës me 20 pikë e 9 kërcime, ndërsa Dukes u dallua në fitoren e Prishtinës kundër Rahovecit 029, duke regjistruar 20 pikë, 3 kërcime e 5 asistime.
