Ambulanca arriti shpejt në vendin e ngjarjes.
Me të marrë informatën, ekipet emergjente si autoambulanca, zjarrfikësit e Policia iu përgjigjën thirrjes së qytetarëve.
Në një aksident trafiku në Gërlicë të Ferizajt, mbeti me lëndime të rënda ky pasagjer.
Atij iu dha menjëherë trajtimi i nevojshëm mjekësor në vendngjarje, e që më pas u fut në veturë për t;u dërguar në Emergjencë.
Edhe shoferi i veturës mbeti brenda, për çka u nevojit intervenimi i zjarrfikësve për ta nxjerrë atë.
Numri i të lënduarve ishte i madh, andaj nevojiteshin më shumë ekipe mjekësore.
Për këtë, Ferizajt i erdhën në ndihmë edhe komunat tjera përreth bashkë me ekipet e tyre.
Të gjithë të lënduarit nga ky aksident, u sollën në bazën e Spitalit të Qytetit.
Kështu edhe përfundoi ushtrimi fushor organizuar në nderim të 25-vjetorit të çlirimit të Ferizajt.
“Me rastin e 15 qershorit ditës së shëndetësisë Ferizajas, zbritja e punëtorëve shëndetësorë respektivisht kthimi në institucionet shëndetësore të punëtorëve shëndetësorë në Ferizaj ne si Drejtori në bashkëpunim me Spitalin Rajonal dhe të gjitha QKMF-të të qyteteve fqinje Shtime, Viti, Kaçanik, Elez Han, kemi bërë një ushtrim fushor me improvizime të rasteve”, ka thënë drejtori i Shëndetësisë dhe Mirëqenies Sociale, Kemaj Emini.
Por, drejtori i Spitalit Rajonal të Ferizajt, Fikret Arifi thekson se po përballen me mungesë stafi, çka e vështirëson reagimin efikas.
“Jemi keq, për arsye se mbulojmë një popullatë të madhe, Spitali i Ferizajt mbulon me shërbime qytetin edhe komunat përreth numri i punëtorëve në krahasim me popullatë është jo i kënaqshëm shpresojmë që do të na ndihmojnë Ministria e Shëndetësisë, SHSKUK-ja edhe ashtu është hapur edhe një konkurs i fundit edhe çdo nr që vjen është ndihmesë për neve”, ka deklaruar ai.
Derisa kryeinfermieri i Komunës, Besim Bega kërkon bashkëpunim më të madh nga qytetarët në raste të tilla.
“Qytetarët në rend të parë duhet me kohë me lajmëru me alarmu rastet në mënyrë që të mos humbet kohë dhe të intervenohet me kohë në vendin e ngjarjes përndryshe dhënien e ndihmës e kanë ekipet e emergjencës primare”, tha ai.
Pas përfundimit, u ndanë edhe mirënjohje për të gjitha ekipet pjesëmarrëse të emergjencave në këtë ushtrim.
