Të dielën e 21 prillit, qytetarët në katër komunat veriore do të marrin pjesë në procesin e votimit për apo kundër largimit të kryetarëve.
Se kjo ditë është një ngjarje e rëndësishme për këto komuna, e thotë edhe Ambasadori i Suedisë në Kosovë, Jonas Westerlund.
Ai për tëvë1 tha se do të ishte zhgënjyese nëse qytetarët nuk do të marrin pjesë në këtë proces.
“Sigurisht që kjo është një ngjarje e rëndësishme, për të cilën komuniteti ndërkombëtar ka pritur. Mendoj që është një mundësi për popullsinë në katër komunat veriore, të shprehin brengat dhe mendimet e tyre. Pra është një mundësi demokratike për ata qytetarë të shprehin brengat e tyre ose përkrahjen për kryetarët aktual të komunave. Mendoj që do të ishte zhgënjyese, nëse popullsia në katër komunat veriore s’do të merrte pjesë, pra inkurajojmë të gjithë të jenë pjesëmarrës”, ka deklaruar ai.
E thirrjet e Listës Serbe për bojkot të këtij procesi po i quan të pasuksesshme Ministri i Zhvillimit Rajonal, Fikrim Damka.
Siç tha ai, vullneti i qytetarëve duhet të shikohet përmes rezultateve që do të arrihen.
“Qeveria jonë është përkushtuar që të mbahen këto zgjedhje, ky referendum në veri prej fillimit. KQZ besoj që është e gatshme për të finalizuar dhe organizuar këto zgjedhje por ju e dini deklarimin e Listës Serbe që të bojkotojnë këto zgjedhje që besoj që nuk kanë me pas sukses kështu qe do të organizojnë por suksese nuk kanë me pas. Por deri në fund përpjekja e Listës Serbe ka qenë që të transferohet ose të merr këto komuna por vullneti duhet të shikohet ne vend votimet. Pa zgjedhje nuk mund të ketë asnjë ndryshim në veri”, ka pohuar ai.
Damka nuk beson që do të ketë ndonjë rrezik.
Madje ai pret që organizimi do të ketë sukses, por jo edhe rezultatet që Lista serbe presin.
