Ambasadori i Francës në Kosovë, Olivier Guerot, ka vendosur lule në Reçak për të nderuar 45 civilët shqiptarë të vrarë në masakrën e ndodhur 27 vjet më parë.
Në një postim të Ambasadës së Francës në Facebook thuhet se Franca, ashtu si kudo tjetër në botë, mbetet e përkushtuar në luftën kundër pandëshkueshmërisë.
Ndërkohë, Guérot ka reaguar edhe në platformën “X”, ku ka ndarë përshtypjet nga ceremonia përkujtimore në varrezat e Reçakut, duke theksuar edhe progresin e Kosovës pas luftës.
“Ceremoni prekëse në Reçak, ku autoritetet dhe qytetarët e Kosovës kujtojnë masakrën e tmerrshme të vitit 1999. Është mahnitëse të shihet se sa është zhvilluar Kosova që nga atëherë. Franca është e gatshme të vazhdojë ta mbështesë Kosovën në rrugën e saj drejt BE-së dhe zhvillimit ekonomik”, ka shkruar Guerot.
Homazhet në Reçak u mbajtën në kuadër të shënimit të përvjetorit të masakrës, një prej krimeve më të rënda të luftës në Kosovë.
