Ambasada e Republikës së Kosovës në Hagë ka reaguar pas aktgjykimit të shpallur sot nga Dhomat e Specializuara të Kosovës ndaj Hashim Thaçit, Kadri Veselit, Jakup Krasniqit dhe Rexhep Selimit.
Në reagimin e saj, Ambasada ka shprehur “shqetësim të lartë” dhe zhgënjim të thellë lidhur me vendimin, duke theksuar se pret që aktgjykimi të ndryshohet në shkallën e Apelit.
“Ushtria Çlirimtare e Kosovës ka bërë një luftë të drejtë, vetëmbrojtëse dhe të domosdoshme. Këtë fakt nuk e ndryshon askush, asnjëherë”, thuhet në reagim.
Ambasada ka deklaruar se beson se “aktgjykimi përfundimtar në shkallën e apelit do ta ndryshojë këtë interpretim dhe këtë aktgjykim”.
Në fund, Ambasada ka shprehur solidaritet me familjet e Thaçit, Veselit, Krasniqit dhe Selimit, ndërsa u ka bërë thirrje qytetarëve të Kosovës që ndodhen në Hagë të ruajnë qetësinë dhe maturinë gjatë protestës.
“Dhuna nuk lejohet. Paqja, dinjiteti dhe respektimi i ligjit janë përgjegjësi e të gjithëve”, thuhet në reagim.
