Ambasada e Britanisë së Madhe në Kosovë ka reaguar me shqetësim për aksionin e zhvilluar të martën ku janë rrënduar disa objekte pa leje të ndërtuara në pronën e Ibër – Lepencit, për rreth Ujmanit.
Sipas reagimit të ambasadës personat e prekur duhet të kenë mundësi të ushtrojnë të drejtën e tyre.
“Ambasada Britanike është e shqetësuar nga prishja e shtëpive pranë Liqenit të Ujmanit/Gazivodës dhe po i ndjek nga afër zhvillimet. Respektimi i sundimit të ligjit kërkon procese të drejta dhe transparente, ku personat e prekur të kenë mundësi të ushtrojnë të drejtat e tyre. Jemi veçanërisht të shqetësuar nga raportimet se veprimet për zbatimin e ligjit kanë vazhduar ndërkohë që procedurat gjyqësore janë ende në zhvillim. Ligji duhet të zbatohet në mënyrë të njëtrajtshme dhe të paanshme në të gjithë Kosovën. U bëjmë thirrje autoriteteve të Kosovës që të angazhohen me komunitetet e prekura, t’i trajtojnë shqetësimet në mënyrë transparente dhe të shmangin veprime të mëtejshme që mund të cenojnë besimin e publikut ose besimin ndërmjet komuniteteve”, thuhet në reagimin e ambasadës.
Për këtë aksion ka reaguar edhe Zyra e Bashkimit Evropian në Kosovë, ambasada e Gjermanisë dhe ajo e Italisë.
Nga Ibër-Lepenci të martën kanë thënë se palët ishin njoftuar për aksionin duke u dhënë kohë 15 ditë që të largojnë gjërat e tyre.
Në mesin e pronarëve të këtyre vilave ishte edhe ajo e kryesuesit të Kuvendit Komunal në Veri të Mitrovicës dhe nënkryetar i Listës Serbe.
