Ambasada e Mbretërisë së Bashkuar në Prishtinë ka mirëpritur emërimin e Kryeprokurorit të ri të Shtetit, Zejnullah Gashi, pas një periudhe disa vjeçare gjatë së cilës ky institucion ishte pa drejtues.
Përmes një postimi në Facebook, ambasada i ka uruar suksese Gashit në detyrën e re, duke theksuar rëndësinë e zbatimit të reformave dhe masave që do të kontribuojnë në forcimin e sistemit prokurorial në Kosovë.
“I urojmë Kryeprokurorit të Shtetit, Zejnullah Gashi, suksese në zbatimin e masave të nevojshme për të siguruar që sistemi prokurorial i Kosovës të zhvillohet si një institucion i pavarur, transparent dhe llogaridhënës”, thuhet në reagimin e Ambasadës së Mbretërisë së Bashkuar.
Ambasada ka vlerësuar se një sistem prokurorial funksional dhe efektiv është thelbësor për forcimin e sundimit të ligjit dhe garantimin e ushtrimit të pavarur të funksioneve të prokurorisë.
“Një sistem prokurorial efektiv është thelbësor për forcimin e sundimit të ligjit, ushtrimin efikas të funksioneve të prokurorisë dhe luftën kundër krimit të organizuar dhe korrupsionit, në interes të të gjithë qytetarëve”, thuhet më tej në njoftim.
Emërimi i Zejnullah Gashit në krye të Prokurorisë së Shtetit është mirëpritur nga partnerët ndërkombëtarë, të cilët kanë ritheksuar rëndësinë e një sistemi të drejtësisë të pavarur, transparent dhe të përgjegjshëm.
