Ambasada e Shteteve të Bashkuara të Amerikës në Kosovë, ka thënë se gjatë vizitë së zëvendësndihmëssekretarit të Mbrojtjes, David Baker u rikonfirmua partneriteti në fushën e mbrojtjes ndërmjet dy vendeve.
Në një postim në Facebook ku është njoftuar për takimet që Baker ka zhvilluar gjatë vizitës në Kosovë thuhet se kjo ishte një mundësi e thellimit të bashkëpunimit.
“Faleminderit Zëvendës Ndihmës Sekretarit të Mbrojtjes, David Baker, dhe Gjeneral Brigade Chris McKinney për vizitën e tyre në Kosovë, ku u takuan me Presidenten Osmani, Kryeministrin në detyrë Kurti, Ministrin e Mbrojtjes Maqedonci, Komandantin e FSK-së, Gjeneralleitnant Jashari, dhe Komandantin e KFOR-it, Gjeneralmajor Enrico Barduani. Ata gjithashtu vizituan Kampin Bondsteel dhe u takuan me pjesëtarë të ushtrisë amerikane. Gjatë gjithë vizitës, Zëvendës Ndihmës Sekretari Baker riafirmoi partneritetin në fushën e mbrojtjes ndërmjet SHBA-së dhe Kosovës dhe mundësitë për thellimin e bashkëpunimit në mbështetje të paqes dhe stabilitetit rajonal”, thuhet nga ambasada.
Baker gjatë vizitës në Kosovës ka takuar presidenten Vjosa Osmani, ministrinë në detyrë të Mbrojtjes, Ejup Maqedonci si dhe ka zhvilluar një darkë pune me kryeministrin në detyrë, Albin Kurti.
