Dialogu i planifikuar strategjik ndërmjet Shteteve të Bashkuara dhe Kosovës, i pezulluar në shtator të këtij viti për shkak të veprimeve të pakoordinuara të Qeverisë Kurti, ende nuk pritet të rifillojë.
Kështu ka bërë të ditur Ambasada e SHBA-së në Prishtinë, e cila thekson se rifillimi i bashkëpunimit varet nga veprimet e kryeministrit kujdestar, Albin Kurti.
Në një përgjigje zyrtare, për Tëvë1 Ambasada ka theksuar se Shtetet e Bashkuara presin hapa konkretë drejt uljes së tensioneve dhe avancimit të objektivave të përbashkëta për stabilitet dhe prosperitet.
“Siç ia kemi bërë të qartë qeverisë së përkohshme, dera është e hapur për përmirësimin e marrëdhënieve dhe rifillimin e bashkëpunimit. Megjithatë, kjo kërkon hapa konkretë nga kryeministri kujdestar Kurti për të de-përshkallëzuar tensionet dhe për të çuar përpara qëllimin tonë të përbashkët për forcimin e paqes dhe stabilitetit si bazë për prosperitet të ndërsjellë ekonomik. Ne do të vazhdojmë të vlerësojmë veprimet e qeverisë së përkohshme. Nuk kemi asgjë tjetër për të njoftuar në këtë pikë,” thuhet në përgjigjen e Ambasadës së SHBA-së.
