Amazon Web Services (AWS) njoftoi të hënën vonë se kishte zgjidhur një ndërprerje masive, e cila la disa nga faqet më të mëdha të internetit në botë jashtë linje për pjesën më të madhe të ditës.
Më shumë se 1,000 aplikacione dhe faqe interneti, duke përfshirë platformat e mediave sociale si Snapchat dhe bankat Lloyds dhe Halifax, u prekën nga problemi që ndodhi në qendrat e operacioneve të Amazon për cloud computing në SHBA.
Monitoruesi i ndërprerjeve të platformës, Downdetector, raportoi se përdoruesit globalisht raportuan më shumë se 11 milionë probleme gjatë ndërprerjes. Probleme u shfaqën që rreth orës 07:00 të hënën dhe përfshinin një gamë të gjerë shërbimesh, nga lojërat masive online si Fortnite deri te aplikacionet e mësimit të gjuhëve si Duolingo.
Ekspertët e teknologjisë paralajmëruan për rreziqet e mbështetjes së shumë kompanive tek një ofrues i vetëm dominues.
“Ajo që ka nxjerrë në pah ky episod është se sa e ndërvarur është infrastruktura jonë,” tha profesori Alan Woodward i Universitetit të Surrey. “Shumë shërbime online mbështeten te palët e treta për infrastrukturën e tyre fizike, dhe kjo tregon se problemet mund të ndodhin edhe tek ofruesit më të mëdhenj të palëve të treta. Gabime të vogla, shpesh të shkaktuara nga njeriu, mund të kenë ndikim të gjerë dhe të rëndësishëm,” shtoi ai.
Ndërprerja u adresua pas disa orësh ndërhyrjesh, por sipas Mike Chapple, profesor i teknologjisë së informacionit në Universitetin Notre Dame, disa defekte “kaskaduese” mund të lindin pas ndërprerjes fillestare: “Është si kur ke një ndërprerje të energjisë në shkallë të gjerë. Ekipet fillojnë të punojnë për ta rikthyer atë në punë. Energjia mund të ndërpritet disa herë. Është e mundur që Amazon fillimisht vetëm t’i ketë adresuar simptomat dhe jo shkakun.”, tha Chapple.
Rreth orës 23:00, Amazon konfirmoi se të gjitha shërbimet e AWS ishin kthyer në operacione normale, pas ngadalësimit të pjesëve të sistemit për të adresuar problemin rrënjësor.
