Ylli ndërkombëtar me rrënjë nga Kosova, Rita Ora, dhe artisti i njohur për audiencën shqiptare, Yll Limani, kanë publikuar të premten bashkëpunimin që ka bërë bujë që nga paralajmërimi i tij.
Kënga mban titullin “All Natural”, e njëjta si soloprojekti i fundit i Ritës, ku këtë herë Limani sjell interpretimin e tij unik në publikimin e përbashkët.
“Ylli dhe unë jemi të dy shqiptarë nga Kosova, dhe kjo lidhje është shumë e fortë – është në historitë tona, në familjet tona, në gjuhën tonë”, ka thënë Rita Ora, sipas komunikatës së labelit Three60 Music, ku është i përfshirë edhe Ylli.
“Të dëgjoja atë duke kënduar në shqip i dha këngës aq shumë autenticitet dhe shpirt. ‘All Natural’ ka qenë gjithmonë për të qenë vetvetja pa komplekse, por ky version ndihet edhe më personal. Është për identitetin, krenarinë dhe bukurinë e origjinës tënde”, shtoi ajo.
Ndërkaq, Yll Limani e ka përshkruar bashkëpunimin me Ritën si një privilegj dhe një mësim mbi artin e të qenit autentik:
“Rita është një forcë e natyrës. Të punosh me të është privilegj dhe një mësim mbi artin e të qenit autentik”, ka thënë Limani.
Kënga e re vjen në dy gjuhë – anglisht dhe shqip – duke reflektuar identitetin dhe origjinën e artistëve, dhe premton të jetë një himn për të gjithë ata që duan të jenë “all natural”, të vërtetë dhe krenarë për rrënjët e tyre.
