Kryetari i Komunës së Shtimes, Qemajl Aliu, ka ngushëlluar familjen e dy viktimave që humbën jetën në një aksident në Kroaci, derisa të njëjtit ishin duke u kthyer në Kosovë.
Në aksident humbën jetën vajza me nënën, ndërsa u lëndua prindi dhe djali i tij.
Aliu, i ka uruar shërim të shpejtë të lënduarve, ndërsa është lutur që ky aksident të jetë rasti i fundit, ku bashkëkombësit pësojnë aksidente gjatë rrugës.
“Jemi tronditur thellë nga lajmi i kobshëm i aksidentit me fatalitet që e ka pësuar bashkëqytetari ynë Safet Gashi nga fshati Pjetërshticë. Gjatë rrugës së kthimit për në vendlindje për t’i kaluar pushimet verore, për fat të keq në shtetin e Kroacisë, familja Gashi kanë pësuar aksident me fatalitet, ku kanë mbetur të vdekura Njomza Olluri-Gashi dhe Olta Gashi. Ky lajm i trishtë na ka prekur skajshmërisht andaj familjeve Gashi dhe Olluri, miqve e të njohurve të tyre ua përcjellim ngushëllimet më të sinqerta për këtë tragjedi të rëndë që na ka goditur të gjithëve. Safetit dhe djalit të tij u urojmë shërim të shpejtë dhe lutemi që ky të jetë rasti i fundit ku bashkëkombasit tanë pësojnë aksidente e humbin jetën në rrugë”, ka shkruar Aliu./teve1.info/
