E për këtë, koordinatori i Institutit Hidrometeorologjik të Kosovës, Besim Aliu tha se njoftimin për stuhi e kanë bërë në kohë reale, teksa shtoi se të dielën kanë dërguar mbi 300 emaile me këtë paralajmërim.
“Ne i kemi mbi 300 emaile në grup që e dërgojmë parashikimin e motit. Të dielën e dërgojmë për 5 ditë. Ne të dielën e kemi parashikuar motin që ditën e hënë do të ketë mot kryesisht të vranët, kështu që do të krijohen vorbulla dhe vranësira të dendura të cilat do të shkaktojnë stuhi lokale, ashtu ndodhi fatkeqësisht”, tha ai në emisionin “Ditari në Tëvë1.
Aliu tutje tha se sa i përket teknologjisë, Instituti Hidrometeorologjik i Kosovës është më mirë se sa vendet e Rajonit.
“Përndryshe me teknologji jemi tamam me kohën, bile edhe më mirë se vendet e rajonit. Stacione kemi edhe në vise malore, në Dragash, në Junik por edhe në vise mesatare, në Prizren, në Istog e Malishevë, Prishtinë, Ferizaj, pothuajse gjithë territorin e kemi të mbuluar me stacione meteorologjike”, shtoi ai.
Ndërkaq, Aliu njoftoi se një mot i tillë me reshje shiu, me intervale kohore me diell si dhe me vranësira të dendura do të vazhdojë deri me datën 13 apo 14 qershor. Mirëpo sipas tij, mund të ketë përsëritje të reshjeve.
Të hënë nga erërat e forta në Prishtinë është rrëzuar një lis dhe ka goditur për vdekje një 30-vjeçar dhe ka lënduar një 30 vjeçare.
