Analisti politik, Artan Alijaj ka deklaruar se mundësia për formimin e një qeverie të re është shumë e vogël, ndërsa si opsione për të shmangur zgjedhjet e parakohshme ai sheh krijimin e një qeverie të pakicës ose një qeverie kalimtare me mandat të kufizuar.
Sipas Alijajt, ekzistojnë dy çështje madhore që duhet të përmbyllen para se vendi të shkojë në zgjedhje: miratimi i buxhetit për vitin e ardhshëm dhe shqyrtimi i një sërë marrëveshjesh ndërkombëtare.
“Mundësia për themelimin e një qeverie është shumë e vogël, mendoj që janë vetëm dy mundësi të mos shkohet në zgjedhje: e para të kemi eventualisht një qeveri të pakicës ose nëse do të ketë një dakordim që të krijohet një qeveri teknike ose kalimtare. Në këtë rast na duhet diçka kalimtare, e kemi një qeveri në detyrë, kjo do të kthehet në një qeveri të pakicës që do të qeveriste për tre katër muajt e ardhshëm dhe pastaj mendoj që janë disa procedura që janë të rëndësishme për vendin tonë, siç është votimi i buxhetit për vitin e ardhshëm. Në të njëjtën kohë mendoj që janë edhe një numër i madh i marrëveshjeve ndërkombëtare që presin të parashtrohen në Kuvend dhe këto dy agjenda mendoj që do të ishin më së rëndësishme që të përfundohen para se të shkojmë në zgjedhje”, ka deklaruar Alijaj në emisionin “Ditari” në Tëvë1.
Derisa, analisti thekson se mundësitë për një qeverisje të shumicës janë minimale. Madje ai nuk sheh mundësi të krijimit të qeverisë Kurti.
“Sa i përket diskutimeve me partitë politike e kanë thënë hapur qoftë PDK, LDK, AAK e Nisma mundësitë e themelimit të një qeverie të shumicës janë minimale të mos themi zero. Nuk ka asnjë negocim që po ndodhë aktualisht, me çfarëdo akteri politik në vend. Nuk shoh ndonjë zhvillim në këtë mes, nuk shoh mundësi të ndonjë krijimi të qeverisë Kurti me numrat aktual”, shtoi ai ndër të tjera./teve1.info/
