Analisti politik Artan Alijaj ka vlerësuar se mbajtja e seancës konstituive të Kuvendit më 6 gusht nuk është e vonshme, pasi, sipas tij, ajo është brenda afateve kushtetuese.
I ftuar në emisionin “Info Nata” në Tëvë1, Alijaj tha se vonesa lidhet edhe me zhvillimet politike dhe procesin e brendshëm zgjedhor në Lidhjen Demokratike të Kosovës (LDK).
“Jo, unë nuk e shoh si të vonshme. Është brenda afateve kushtetuese. E dimë që kemi një komplikim në negociatat mes LVV-së dhe LDK-së. Gjithashtu e dimë se LDK-ja ka kërkuar që negociatat të pezullohen deri në përfundimin e kuvendit zgjedhor brenda partisë. Nuk shoh asgjë të keqe këtu. Mbetet të shihet se si do të shkojë ai kuvend dhe më pas, brenda një jave, nëse do të ketë marrëveshje për bashkëqeverisje me LDK-në. Nëse jo, atëherë LVV-ja do të duhet të gjejë një zgjidhje tjetër për krijimin e qeverisë dhe më pas edhe për çështjen e presidentit”, ka deklaruar Alijaj.
I pyetur nëse një marrëveshje mes Lëvizjes Vetëvendosje dhe LDK-së do ta zgjidhte edhe çështjen e zgjedhjes së presidentit, Alijaj tha se matematikisht kjo do të krijonte një bazë të fortë votash, por nuk garanton domosdoshmërisht mbështetjen e plotë.
“Nëse i llogarisim numrat, është një garanci. Megjithatë, e dimë se ka qëndrime të ndryshme të individëve. Edhe herën e kaluar, kur u votua Vjosa Osmani për presidente, disa deputetë të LDK-së ishin kundër, por qëndruan në sallë. E njëjta mund të ndodhë edhe këtë herë. Vetë prania e deputetëve mund të jetë e mjaftueshme, sepse në raundin e tretë nevojiten vetëm 60 vota”, ka thënë Alijaj.
