Konsulenti politik Artan Alijaj, në emisionin “Info Nata” në Tëvë1, ka komentuar nisjen e ndërtimit të dy urave të reja mbi lumin Ibër në Mitrovicë, duke theksuar se çështja e urës kryesore të Ibrit mbetet më shumë politike se infrastrukturore.
“Është mirë të ndërtohen ura dhe rrugë të reja, mirëpo në Mitrovicë, sidomos te ura e Ibrit, problemi është më shumë politik sesa infrastrukturor. Ka nevojë për zgjidhje reale të këtyre problemeve,” u shpreh Alijaj.
Ai gjithashtu shprehu dyshime për kohën e nisjes së projektit, duke thënë se deklaratat e kryeministrit Kurti për përfundimin e urave në vjeshtë mund të lidhen me zgjedhjet lokale.
“Po shpresojmë që nuk do të ketë vonesa, siç tha edhe kryeministri, por mënyra se si po prezantohet lë të kuptohet që mund të lidhet me zgjedhjet,” shtoi ai.
Alijaj komentoi edhe reagimet e shteteve evropiane, duke përmendur sanksionet e vazhdueshme ndaj Kosovës dhe duke ngritur pyetje mbi kohën e nisjes së projektit.
“Ne kemi kohë që përballemi me sanksione nga shtetet evropiane. Por ajo që më bën përshtypje është: nëse kjo Qeveri e kishte planifikuar ndërtimin e këtyre urave, pse nuk e realizoi më herët, gjatë mandatit të kaluar?” pyeti ai.
Në fund, Alijaj foli për takimin e paralajmëruar mes Presidentes dhe liderëve politikë, duke theksuar se nuk pret rezultate konkrete ose qasje korrekte.
“Sinqerisht, nuk pres diçka të drejtë apo të ndershme nga ky takim,” përfundoi ai.
