Analisti politik, Artan Alijaj, ka vlerësuar si të rëndësishme vizitën e ndihmës-sekretarit amerikan të shtetit, Brendan Hanrahan, i cili pritet të qëndrojë këtë javë në Kosovë, në kohën kur vendi përballet me një krizë politike.
Alijaj tha se mungesa e institucioneve të konfirmuara me votën e qytetarëve është jo vetëm shqetësuese për opinionin publik vendor, por edhe për partnerët ndërkombëtarë.
“Është shqetësuese jo vetëm për ne si publik kosovar, por edhe për partnerët ndërkombëtarë që të mos kemi institucione të konfirmuara me votën e popullit tashmë. Temë e diskutimit, besoj që do të jetë edhe kriza institucionale. Është hera e parë që kemi një vizitë të tillë që nga ardhja e presidentit Trump – unë e mirëpres si të tillë”, u shpreh ai.
Sipas Alijajt, vizita e përfaqësuesit amerikan vjen në një kohë kur Kosova mbetet ende në një “vatër krize”.
“Është mirë që ta shohim prezencën amerikane në aspektin global – mendoj që e shohim se kemi çdo muaj, nëse jo çdo dy-tre javë, konflikte nëpër botë. Kështu që edhe ne jemi në një vatër krize ende, fatkeqësisht. Kjo është imperativ për neve që ta tejkalojmë këtë krizë dhe t’i zgjedhim problemet tona njëherë e përgjithmonë me fqinjin tonë”, tha ai.
Alijaj theksoi se për të përballuar sfidat aktuale, Kosovës i duhet një qeveri legjitime dhe e fuqishme, e cila del nga vullneti i qytetarëve.
“Na duhet një qeveri e fortë, një qeveri e cila do të merret me këto probleme, një qeveri që do të dalë nga votat e qytetarëve. Kjo krizë institucionale është një pengesë e madhe për ecjen përpara të vendit, qoftë në nivelin rajonal, qoftë në atë ndërkombëtar”, përfundoi ai.
Vizita e Hanrahan shihet si një sinjal i rritjes së vëmendjes së SHBA-së ndaj zhvillimeve politike në Kosovë, veçanërisht në prag të vendimeve të mundshme për zgjedhje të reja dhe dinamika të reja në dialogun me Serbinë.
Kështu kanë bërë të ditur për Tëvë1 nga ambasada amerikane, ku kanë njoftuar se Brendan Hanrahan do të takohet me zyrtarë qeveritarë, udhëheqës të opozitës dhe përfaqësues të bizneseve./teve1.info/
