Analisti politik Artan Alijaj ka vlerësuar se Aleanca për Ardhmërinë e Kosovës dhe Nisma Socialdemokrate do ta kenë të vështirë kalimin e pragut zgjedhor në zgjedhjet parlamentare që do të mbahen më 28 dhjetor.
Në emisionin “Ditari” në Tëvë1, Alijaj ka thënë se më e rrezikuar është Nisma Socialdemokrate, ndonëse sipas tij edhe AAK-ja përballet me rrezik serioz për të mos siguruar përfaqësim në Kuvend.
Ai ka shtuar se partneriteti i mëparshëm mes këtyre partive mund t’u ketë siguruar pjesëmarrjen në Kuvend në zgjedhjet e kaluara, por mbetet për t’u parë nëse AAK-ja do të arrijë ta kalojë pragun zgjedhor e vetme.
“Nëse i marrim për bazë sjelljet e fundit më 9 shkurt, mendoj se të dyja rrezikohen, por ndoshta shumë më tepër rrezikohet Nisma. Mbetet të shihet nëse u ka kushtuar partneriteti që e patën; unë nuk jam i sigurt se u ka kushtuar, përkundrazi mendoj se partneriteti ua ka siguruar pjesëmarrjen në Kuvend në zgjedhjet e 9 shkurtit. Po ashtu, mbetet të shihet nëse AAK-ja do të mund ta kalojë pragun zgjedhor e vetme, në kushte normale. Për një parti që ka disa komuna në qeverisje, do të pritej që kalimi i pragut zgjedhor të ishte shumë më i lehtë, mirëpo zgjedhjet e 9 shkurtit na treguan të kundërtën”, ka deklaruar Alijaj.
Ai tutje ka theksuar se kalimi i pragut zgjedhor për këto dy subjekte do të varet në masë të madhe nga pjesëmarrja e votuesve në zgjedhje.
Sipas tij, nëse në zgjedhje marrin pjesë rreth një milion votues, situata do të bëhet shumë e vështirë për AAK-në.
“Mendoj se shumëçka do të varet edhe nga numri i votuesve që dalin në zgjedhje. Sa më e madhe të jetë pjesëmarrja, aq më i lartë do të jetë pragu real për të hyrë në Kuvend. Nëse numri i votuesve arrin deri në një milion, atëherë mendoj se do të jetë shumë e vështirë edhe për AAK-në, ndërsa për Nismën është thuajse e sigurt se kalimi i pragut zgjedhor do të jetë shumë problematik. Mbetet të shihet nëse AAK-ja do të arrijë ta kalojë këtë prag. Shpresoj që ta arrijë, pasi që nëse do të përfundonim vetëm me tri parti politike në Kuvendin e Kosovës, kjo ndoshta nuk do të ishte e mirë për demokracinë në vend”, ka thënë ai.
