Alergologu, Dukagjin Zogaj, në emisionin e mëngjesit “Herët” në Tëvë1, ka folur rreth alergjisë në stinën e pranverës.
Sa i përket alergjisë më të përhapur në pranverë, asaj të polenit, Zogaj tregoi se kjo alergji ndahet kryesisht në tri sezone të ndryshme, raporton teve1.info.
“Alergjia e polenit ndahen në tri sezone të ndryshme. E kemi sezonin madhor, pranverën, pra të gjithë e dinë që është sezona e polenit. Kemi sezonin e hershëm të polenit, e që është poleni i drunjve të gjatë, ku faktikisht veç kanë filluar të dalin. Pra, lajthia e lëshon lulen e vet, qysh nga fillimi i shkurtit. E kemi edhe sezonin e vonshëm polenik, i cili është në fillim të verës e në fund të vjeshtës, ai është poleni i kaçubave ose shkurreve. Do të thotë ekziston një laramani sa i përket paraqitjes së poleneve. E një pacient mund të jetë alergjik në të gjitha këto. Dikush mund të ketë probleme me alergji që nga shkurti deri në fillim të vjeshtës”, tha Zogaj në Tëvë1.
Njëherit, Zogaj bëri të ditur se shkaktarë tjerë të alergjisë, mund të jetë edhe pluhuri i shtëpisë, lagështia, kafshët shtëpiake, e të tjera.
“Diagnostifikimi i alergjisë inhalatore, është shumë i thjeshtë. Ekziston një metodë e cila quhet testi lëkuror. E kemi edhe përcaktimin e alergjive përmes gjakut me serum”, theksoi tutje Zogaj./teve1.info/.
