Përgatitjet e fundit u bënë.
Pas pak minutave, në Shoqatën e Lidhjes dhe Invalidëve të Viktimave Civile në Kosovë arriti edhe ushtruesja e detyrës së Presidentes, Albulena Haxhiu.
Kur erdhi, u ulën për të diskutuar rreth nevoja dhe sfidave që po kalon kjo qendër.
Madje Haxhiu tha se nuk është hera e parë që e viziton këtë Shoqatë.
“Kjo është vizita ime e dytë. Vizitën e parë e kam bërë sa kam qenë ministre e Drejtësisë në kuadër të fushatës 16 ditë të aktivizimit kundër dhunës në familje, dhe tani edhe si ushtruese e detyrës së presidentes. Do të njoftohem për përparimet që kanë ndodhur prej asaj kohe dhe natyrisht për nevojat dhe sfidat që kjo qendër po i kalon. Pas kësaj konference do të kem takim me gratë që janë viktima të dhunës seksuale. Mirëpo për shkak të konfidencialitetit, nuk është e mundshme që mediat të jenë të pranishme dhe uroj mirëkuptimin tuaj për këtë. Prandaj edhe gjatë atij takimi do të njoftohem me sfidat që ato i kanë, qofshin ato shëndetësore apo sfidat që i kanë me aplikimin tek Komisioni për njohjen e statusit të viktimave të dhunës seksuale”, ka thënë Haxhiu.
Haxhiu pati edhe një thirrje për të gjitha viktimat e dhunës seksuale gjatë luftës së fundit në Kosovë.
“Të gjithë personave që kanë qenë të dhunuar seksualisht gjatë luftës së fundit në Kosovë që të aplikojnë për njohje të statusit. Ju e dini që janë katër organizata të licencuara që merren me ndihmën e personave të mbijetuar të dhunës seksuale, përfshirë pastaj si organizata e pestë edhe organizatën në të cilën jemi, që në vazhdimësi i kanë ndihmuar personat e dhunuar që t’i tejkalojnë sfidat me të cilat ata përballen”, ka thënë tutje Haxhiu.
Për sfidat që përballet kjo shoqatë foli drejtori i saj, Mustafë Prenku.
“Në këtë qendër i kemi mbi 900 gra që kryejnë trajnime, mbi 400 raste të rasteve të dhunës seksuale gjatë luftës që kanë përjetuar dhunë gjatë luftës. Dhe jam shumë krenar që del dikush të na vizitojë dhe i din hallet dhe dertet e organizatave që merren me këto kategori të dala nga lufta. Rastet e dhunës seksuale gjatë luftës kanë shumë probleme, kanë ankesa si në shëndetësi, si në familje, si gjithkund”, u shpreh Prenku.
