“Albin mos me qenë ti unë nuk isha la këtu hiq”, po e falënderon Albin Kurtin derisa po lahet në liqenin e Ujmanit.
Tani, ky liqe është futur në listën e destinacioneve për shumë kosovarë.
Numri më i madh i tyre është gjatë ditëve të vikendit, por edhe gjatë ditëve të javës nuk po mungojnë.
Sami Hajzeri nga Mitrovica erdhi që të rikujtojë fëmijërinë e tij pasi nuk ka qenë që nga viti 1991.
“Si fëmijë kam qenë shumë herë por sivjet është hera e parë. Kam udhëtuar të gjitha vendet e botës, si Kosova që i ka të gjitha nuk ka vend por këtu pak mbeturinat po na irritojnë shumë”, tha ai.
Ekipi jonë gjatë vizitës në Liqenin e Ujmanit, rrugës që të shpie poshtë tek liqeni ka hasur në mbeturina.
Kishte edhe qytetarë të tjerë nga Mitrovica që nuk janë larë asnjëherë në Liqenin e Ujmanit.
“Për me ardh mu la është hera e parë por kam kalu disa herë. Jo se nuk ka ardh kerkush jo vetëm unë por kerkush”, tha vizitori, Krenar Zejnullahu.
E Basri Seferi mori rrugën nga Shtimja për të ardhur deri këtu.
Por ai ka një kërkesë.
“Duke parë edhe në rrjete sociale, edhe pse ne kemi qenë edhe para se të informohemi në rrjete sociale, sepse ka shumë liqe të bukur Kosova por të Liqeni i Ujmanit nuk kemi qenë asnjëherë është hera e parë që erdhem. Ka nevojë pak për intervenime për zbritjen prej rrugëve këtu prej parkingut, është një rrugë pak e vështirë të kalohet deri të uji”, tha Seferi.
Zëvendësdrejtori i Policisë në Mitrovicë të Veriut, Veton Elshani, tha se situata në veri të vendit është e qetë dhe nuk qëndrojnë Njësitë Speciale vazhdimisht mirëpo kontrollohet kohë pas kohe.
Sipas tij, qytetarët duhet të kenë kujdes.
“Mund të themi që qytetarët janë mjaftë të sigurtë por duhet të kemi kujdes sepse është një territor shumë i gjerë. Policia është cdo kund mirëpo duhet të kemi kujdes”, tha Elshani.
