Sulmuesi i FC Basel, Albian Ajeti, po kalon një periudhë jo shumë produktive para portës, por mbetet i bindur se roli i tij në skuadër nuk matet vetëm me gola. Në një intervistë për gazetën zvicerane St. Galler Tagblatt, futbollisti shqiptar theksoi se është i qetë dhe beson se shumë shpejt do të rikthehet te golat.
“Ka faza kur edhe një sulmues nuk shënon. Por unë do të shënoj sërish – ndoshta në ndeshjet e ardhshme. Nuk jam aspak i shqetësuar,” u shpreh Ajeti, duke treguar qetësi dhe vetëbesim pas disa ndeshjeve pa gol në Superligën zvicerane.
Megjithatë, ai pranon se mungesa e vazhdimësisë në performancë është një problem jo vetëm për të, por për gjithë skuadrën e Baselit. “Duhet të jemi më konstantë – unë personalisht, por edhe si ekip. Kjo është diçka që duhet ta përmirësojmë,” tha ai.
Në fundin e sezonit të kaluar, Ajeti kishte gjetur formën më të mirë, duke u kthyer në zgjedhjen e parë të trajnerit për repartin ofensiv. Edhe pse nuk po shënon aktualisht, 27-vjeçari nga Kosova thekson se ndihmon në mënyra të tjera.
“E di si mund t’i ndihmoj ekipit, pavarësisht nëse shënoj apo jo. Trajneri e ka parë që harmonizohem mirë me skuadrën. Jam i fortë në kombinime me Shaqirin dhe me lojtarët e krahëve. Edhe kur nuk shënoj, mendoj se i jap shumë ekipit. Kjo është arsyeja pse luaj rregullisht,” shtoi ai.
FC Basel aktualisht po kërkon stabilitet në kampionat, ndërsa Ajeti mbetet një nga pikat kyçe të skuadrës për t’u rikthyer në rrugën e fitoreve.
