Kryetari i Komunës së Gjilanit, Alban Hyseni, e ka quajtur tragjedi vdekjen e një qytetari të moshës 50-vjeçare i cili humbi jetën pas kaplimit të banesës nga zjarri, raporton teve1.info
Përmes një statusi në Facebook, Hyseni ka shkruar se njësitet e zjarrfikësve dhe policia kanë dalë me urgjencë në vendin e ngjarjes duke i evakuuar banorët tjerë nga ndërtesa.
Hyseni ka uruar që, siç e ka quajtur ai, tragjedi të tilla të mos përsëriten kurrë derisa i ka shprehur ngushëllime familjes dhe miqve të të ndjerit.
“Një tragjedi e rëndë na ka goditur sot. Një 50-vjeçar humbi jetën sot në një aksident zjarri, duke lënë zbrazëti të madhe në zemrat e familjes, por edhe gjithë miqve e bashkëqytetarëve.
Njësitet e zjarrfikësve dhe policia e qytetit me urgjencë kanë dalë në vendin e ngjarjes, ku dhe kanë bërë evakuimin e të gjithë banorëve nga ndërtesa, për çështje sigurie.
Shpresojmë që tragjeditë e tilla të mos përsëriten kurrë. Ngushëllimet e mia më të sinqerta familjes dhe të gjithë atyre që e njohën të ndjerin!”, ka shkruar Hyseni.
