Në mbledhjen inauguruese të Kuvendit të Komunës së Gjilanit, të udhëhequr nga anëtari më i vjetër Isa Agushi, kryetari Alban Hyseni dhe anëtarët e rinj të Kuvendit dhanë betimin për fillimin e mandatit të ri. Me këtë akt, Hyseni zyrtarisht nis mandatin e tij të dytë në krye të komunës.
Gjatë fjalës së tij, Hyseni theksoi se momenti i betimit është më shumë se një procedurë formale, duke e cilësuar atë një çast reflektimi dhe përgjegjësie.
“Sot, duke qenë para secilit prej jush, unë ndjehem shumë krenar, sepse qyteti ynë ka qytetarë të mirë, të mençur e punëtorë, që besojnë në institucionet e tyre dhe te ardhmja e vendit. Pikërisht mbi këtë bazament moral e shoqëror, ndërtohet edhe vizioni ynë”, deklaroi kryetari Hyseni.
Ai theksoi se Komuna e Gjilanit ka nisur tashmë një transformim të rëndësishëm, i cili nuk matet vetëm me infrastrukturë fizike, por me mundësi të reja për qytetarët.
“Transformimi nuk matet vetëm me kilometër gjatësi apo metër katror ndërtim, por më shumë matet me mundësi të reja për njerëzit”, shtoi ai.
Mbledhja inauguruese shënon hapjen e një cikli të ri institucional në Gjilan, me pritshmëri për vazhdimin e projekteve dhe reformave në shërbim të qytetarëve të komunës.
