Pavarësisht se Kosova vazhdon të mbetet vendi i vetëm në Evropë pa liberalizim të vizave, qytetarët po gjejnë forma të ndryshme për të shkuar në vendet e zonës Shengen.
Kështu që vetëm gjatë vitit 2021, largimi i kosovarëve në vendet perëndimore, krahasuar me vitin 2020 është rritur për afro 400 për qind.
Sipas të dhënave të Agjencisë së Statistikave të Kosovës, nga 8 mijë e 724 persona sa ikën nga vendi në vitin 2020, ky numër u rrit në 42 mijë e 728 në vitin 2021.
Demografi Hazer Dana thotë se politika duhet t’i evidentojë saktë shkaqet e migrimeve e në bazë të tyre të ndërmarrë masa për të ndaluar ikjen e të rinjve.
“Kur ne e kemi trendin aktual të saktë se sa janë ato migrime, cilat janë faktorët e migrimeve, kah janë drejtimet e migrimeve, cilat struktura migrojnë më së shumti dhe cilat janë arsyet e migrimeve, saktë numrin e tyre dhe ne atëherë duhet të përgatisim politika të sakta për të cilat politika, qeveria duhet t’i ketë parasysh dhe të veprojë në bazë të tyre”, thotë Dana.
Për antropologun Tahir Latifi, të dhënat për migrimet tregojnë se në Kosovë po ndryshon struktura demografike e kësisoj ndikohet edhe ekonomia e vendit.
“Në një të ardhme jo shumë të largët, më shumë se një dekadë e gjysmë a dy, Kosova potencialisht do ta mbërrijë nivelin e disa vendeve të BE-së sa i përket mesatares së popullsisë, na e kemi 30.2 tash ende po me këto trende të migrimit realisht i bie shpejt me ndryshu struktura.[9:17] Kjo mandej e rrezikon edhe balancën ekonomike të Kosovës sepse nëse ulet produktiviteti i shtresës e cila punon dhe kontribuon në buxhet, në të njëjtën kohë rritet numri i atyre që do të jenë përfitues të sistemit pensional”, thotë Latifi.
Përderisa migrimi ndër vite është rritur, nataliteti ka shënuar rënie të theksuar.
Kronika e realizuar nga gazetari Gojart Jashari.
