Një alarm për bombë ka detyruar nxënësit dhe stafin e SHFMU “Daut Bogujevci” në Fushë Kosovë të dalin menjëherë jashtë nga objekti i shkollës.
Sekretari i shkollës, Betim Ahmeti, konfirmoi për Tëvë1 situatën dhe veprimet e ndërmarra:
“Ka pasur një alarm për bombë në shkollë, dhe menjëherë kemi urdhëruar nxënësit dhe stafin të evakuohen jashtë për sigurinë e tyre,” tha Ahmeti.
Ai shtoi se të gjithë nxënësit dhe punonjësit e shkollës janë larguar nga objekti dhe se policia tashmë po menaxhon situatën:
“Po jemi njoftuar për një alarm brenda shkollës. Nxënësit janë urdhëruar që të largohen sa më shpejt që është e mundshme. Shkolla e ka marrë email dhe ka lajmëruar Drejtorinë e Arsimit dhe policinë. Kemi bërë evakuimin e nxënësve, dhe të gjithë janë siguruar që askush të mos mbetet brenda. Në fund, unë dola me policinë, dhe tash shkolla është nën menaxhim të policisë. Janë bllokuar të gjitha hyrjet, kështu që gjithçka është nën kontroll sa i përket nxënësve. Tash mbetet proces i policisë. Krejt nxënësit janë larguar nga shkolla dhe janë në objektin e komunës,” tha Ahmeti.
Policia dhe autoritetet përgjegjëse po kryejnë kontrolle të detajuara për të verifikuar rrezikun dhe për të siguruar ambientin e shkollës.
.
