Vetura të shumta policore u panë në Aeroportin Ndërkombëtar të Prishtinës.
Në ora 10:30 e ditës së martë, morën informacionin për një shpërthim brenda aeroportit.
E kjo bëri që njësitet e specializuara policore, të shihen edhe brenda aeroportit “Adem Jashari”.
Por, edhe pas kontrolleve të detajuara, thonë nuk hasën gjë të dyshimtë.
“Nga njësitë e specializuara janë kryer kontrolle të plota të zonës dhe nuk është gjetur asgjë e dyshimtë. Policia e Kosovës është e përkushtuar për sigurinë e të gjithë qytetarëve dhe do të vazhdojë të monitorojë nga afër situatën. Ne vlerësojmë bashkëpunimin dhe durimin e qytetarëve si dhe personelit të aeroportit gjatë kësaj kohe”, ka njoftuar Policia e Kosovës.
E shumë shpejtë, në aeroportin ndërkombëtar “Adem Jashari” u kthye normaliteti.
“Ka rezultuar se kërcënimi për bombë ka qenë alarm i rrejshëm. ANP ‘Adem Jashari’ LKIA është i hapur për fluturime, dhe të gjitha fluturimet do të procesohen si zakonisht”, është thënë nga aeroporti.
Por, pavarësisht se alarmi për bombë rezultoi i rrejshëm, kjo situatë po i shqetëson udhëtarët.
“Mendoj që këto (alarme) janë shqetësuese. Pse me ba një panikë të tillë, kur ne vetëm dalim me i prit mërgimtarët”, shprehet një qytetar
E një qytetar tjetër, për këtë lajm u njoftua nga mediet.
Por, pavarësisht kësaj doli t’i pres familjarët.
“Sigurisht që na shqetëson pa masë, edhe neve, edhe të rinjtë, gjithë popullatën. Lajmin e dëgjova përmes medieve, por nuk e di sa është e saktë. Të drejtën më të thënë, është shqetësim i madh”, është shprehur Salih Bajrami- qytetar.
Ndryshe, alarme për bombë ka pasur edhe në të kaluarën në Aeroportin Ndërkombëtar të Prishtinës “Adem Jashari”.
Por, të gjitha deri më tani kanë rezultuar alarme të rreme.
